Inuiaqatigiinni akisussaaqataaneq/CSR

Kalaallit Nunaanni aningaaseriviit annerit ilagimmatigut, nunatsinnilu suliffeqarfiugatta inuiaqatigiinni annertuumik akisussaaffeqarpugut. Taamaammat piujuartitsineq pingaartissallugu pissusissamisoorpoq – Nunatsinni avatangiisit innuttaasullu eqqarsaatigalugit.

Aningaasaqarnikkut sullissineq sunniuteqarluartumillu akisussaassusilimmillu bankimik ingerlatsineq uagut suliassaraavut. Piujuartitsinermut atatillugu sulinitsinni aningaaserinikkut periarfissanik piujuartitsinerusunik inerisaajuarneq sulissutigiuartarparput.

Taamaasilluta sullitavut, uatsinni sulisut, aningaasaliisut inuiaqatigiillu suleqatigalugit nalittorsaasarpugut.

Soqutigisaqaqativut

Sullitat

Ullutsinni pissutsit nutarsarneqaraluttuinnarput, inuiaqatigiillu akuuffigut assigiinngisitaarlutillu allanngorartuarput. Bankivimmi sullitatta qitiutittuarnissaat sulissutigaarput. Akisussaassuseqarneq tatigeqatigiinnerlu tunngaviliullugit sullitat ataavartumik kiffartuukkusuppagut, tamanna sullitatsinnut uatsinnullu naleqarnerulersitsissammat.
Niuernikkut ingerlatsinitsinni sullissilluarnissarput aalajangiisuummat CSR-imik suliaqarnitsinni sullitavut soorunami pingaaruteqarput.

Sulisut

Sulisitsisuulluni pikkorissunik eqeersimaartunillu sulisoqartuarnissaq nutaanillu ornigarneqarnissaq pingaaruteqarluinnarpoq. Bankivimmi sulisutta aningaasarsiornikkut naleqarnerulersitsiviusumik ingerlatsineq pikkoriffigalugulu piumassuseqarfigisariaqarpaat. Taamaattumik suliffeqarfiup iluani sulisut atugarissaarnissaat pikkorissarnissamullu periarfissaqartarnissaat sulissutigiuarparput.
Nalunngilarput suliffiup iluani avataanilu inuuneq imminnut akulerutsinnagit oqimaaqatigiissumik ingerlanneqartussaasut. Aamma nalunngilarput ingerlatseqatigiiffipput siunissami aningaaserinerup silarsuaani ingerlalluassappat sulisut atugarissaarlutillu peqqissuunissaat pingaaruteqarluinnartoq.

Aningaasaliisut

Ammasumik periuseqarnissaq aningaasaliisut piumasaqaatigisarpaat – ingammik piujuartitsinermut tunngasuni. Taamaammat nunat tamat piumasaqaatigisaat aningaasaliisuttalu piumasaqaataat eqqumaffigalugit sulinissarput pingaaruteqarpoq. Nunarsuarmi pissutsini eqeersimaarluta peqataagutta aningaasaliisutsinnut nalittorsaanerpaassaagut, tamannalu ilaatigut Parisimi isumaqatigiissutip 2015-imeersup FN-illu nunarsuarmi anguniagaannik 17-iusunik malinninnikkut ingerlattarparput.

Inuiaqatigiit

Bankerput ukiut 100 sinnerlugit ingerlatsinikuuvoq, inuiaqatigiinnilu akuunissaq pingaartittuaannarparput. Inuiaqatigiinni isumaginninnikkut, kulturikkut aningaasaqarnikkullu ineriartorneq tapiiffigiuarsimavarput. Suliffeqarfitta Nunanut Avannarlernut allanut siammariartornerani inuiaqatigiinni najuuffigisatsinni tamani pisuni assigiinngitsuni, timersoqatigiiffinni, kulturikkullu aaqqissuussinerni tapersersuisarnissarput aallutaraarput.

FN-ip nunarsuarmi anguniagai

Immikkut sammisat qulaani allassimasut pingasut aallaavigalugit Bankiviup FN-ip piujuartitsisumik ineriartortitsinissaq pillugu nunarsuarmut anguniagai 17-it tapersersorpai. Ukiuni kingullerni nunarsuarmi oqartussaasut, inuussutissarsiortut, peqatigiiffiillu allat FN-ip nunarsuarmut anguniagaanik tapersersuisut amerliartuinnarsimapput. Bankivik aamma suliniummut tamatumunnga tapersersueqataarusuppoq, siunissaq pitsaanersusoq piujuartitsisorlu anguniarlugu. Bankivimmi uagut suliaqarfipput aallaavigalugu nunarsuarmut anguniakkat 17-iusut sammisimavagut, aalajangersimavugullu anguniakkat tallimat immikkut aallutariniarlugit:

• Ilinniartitaaneq pitsaassusilik (nr. 4)
• Suiaassutsit naligiissitaanerat (nr. 5)
• Suliffiit naapertuuttut aningaasarsiornikkullu siuariartorneq (nr. 8)
• Inoqarfiit piujuartitsiffiusut (nr. 11)
• Silap pissusia suliniuteqarfigalugu (nr. 13)